Pas arrestimit të dy kolegëve të tyre, mjekët e Spitalit të Traumës kanë dalë ditën e sotme në protestë.
DY Mjekët, Ervin Sulaj dhe Serdi Memimi akuzohen se kanë marrë rryshfet nga familjarët e njërit prej të plagosurve në masakrën e Velipojës, për operim.
Disa nga bluzat e bardha shprehen se arrestimi i kolegëve të tyre është i padrejtë, duke e cilësuar shkelje të integritetit për bluzat e bardha masën e sigurisë “arrest me burg”, deri në përfundimin e plotë të hetimit.
Një prej mjekëve u shpreh se “Duhet autonomi spitalore. Kanë dhënë njerëzit bakshish dhe vazhdojnë të japin”. Ai solli në vemendje edhe një deklaratë të kryeministrit Rama, i cili shprehej se problem nuk janë njerëzit, por sistemi.
“Kryeministri para disa vitesh ka thënë se problem në Shqipëri për korrupsioni është sistemi dhe jo individi. Ai ka thënë se edhe nëse sjellim një gjerman këtu ai do të arrestohet. U arrestuan ata, a u zgjidh problemi?! A vazhdon të jepet sot sërish bakshish?! Sigurisht që po. Kryeministri ka premtuar autonomi spitalore. Ne presim. Duhet autonomi spitalore. Kanë dhënë njerëzit bakshish dhe vazhdojnë të japin. Problem është sistemi”-u shpreh mjeku i Spitalit të Traumës.