Muaji shkurt ka nisur me një rekord të ri të çmimit të karburanteve në vend.
Këtë të martë një litër naftë në një prej operatorëve më të mëdhenj në treg kapi vlerën e 193 lekëve. Rritja është 8 lekë më shtrenjtë, pasi në dy-tre muajit e fundit, çmimi varionte deri në 185 lekë për litër.
Ky çmim nuk është reflektuar në të gjithë tregun, por operatorët thonë se rritja është e pashmangshme pasi sipas tyre një fuçi në naftë në tregun e huaj ka arritur në 90 dollarë. Për ekspertët, ky trend ishte i pritshëm.
Një tjetër faktor që ka ndikuar në këtë shtrenjtim është edhe paketa fiskale. Tashmë me ndryshimet ligjore mbi taksën fikse të akcizës do t’i shtohet edhe norma e inflacionit vjetor. Kjo politikë fiskale rrit automatikisht me 2% më shumë çmimin final te konsumatori.
Ndryshimi ligjor që ka hyrë në fuqi nga një janari është i vlefshëm për produktet që paguajnë akzicë, çka do të thotë se pritet një tjetër valë çmimesh.
Prej disa muajsh qytetarët po përballen me çmime të shtrenjtuara, duke bërë që inflacioni të arrijë nivelin më të lartë të dekadës së fundit në 3.7 % në dhjetor.