Lajmi i shpërndarë në të gjitha mediat se trajneri i ri i Partizanit do të ishte ish-kampioni i botës dhe ish-trajneri i Brazilit, Karlos Dunga, ka rezultuar të jetë i pavërtetë.
Në konferencën e sotme për shtyp, presidenti Gaz Demi ka konfirmuar se trajneri i ri i Partizanit do të jetë Arber Abilaliaj.
Abilaliaj do të kryejë dy rolet, si trajner dhe gjithashtu si drejtor sportiv.
Presidenti Demi, duke folur para mediave, ka thënë: “Ka një javë që kemi bërë këtë vendim, por Arbëri ka qenë i zënë me disa lojtarë. Nuk mund të them se ja mbusha mendjen, por pas diskutimeve pozitive, arritëm në përfundimin që të mbyllnim njëherë e mirë të gjitha fjalët.
Arbëri ka pranuar me kënaqësi. Është një detyrë e vështirë, por ai e ka marrë përsipër që të kushtohet më shumë Partizanit. Koha do të tregojë se si do të shkojë”.
Presidenti Demi gjithashtu ka komentuar spekulimet për Karlos Dungan, duke thënë: “Karlos Dunga? Këto janë thashetheme të mediave. Ai është një burrë i madh, i respektuar shumë, por unë sot në mëngjes jam habitur kur dëgjova këto. Është hera e parë që e dëgjojmë sot”.
Karlos Dunga, është shpallur kampion Bote në vitin 1994.Dunga ka qenë edhe dy herë trajner i Brazilit në vitet 2006-2010 dhe 2014-2016. Gjithashtu ka drejtuar Sport Club Internacional në Brazil.