Opozita e përfaqësuar nga Alibeaj që do të marrë pjesë në zgjedhje do të turpërohet, ka qenë ky komenti i Ivi Kasos në lidhje me pjesëmarrjen e PD-së në zgjedhjet lokale. Ai u shpreh se është vetë qeveria që ia dha këtë mundësi opozitës në mënyrë që të ketë lehtësi në dominim.
“Ne kemi denoncuar prej kohësh atë që nuk mund të quhet ndonjë plan i fshehtë i kryeministrit por atë që është i pastër si drita e diellit, të diktojë se kush është opozita në vend dhe sigurisht opozitën që vetë ai e ka përcaktuar si të tillë dhe e ka zgjedhur sit ë tillë. Unë nuk jam nga ata që e kërkon fajin tek të tjerët por s’mund të lemë pa thënë gjërat. Kryeministri bën gjëra të pamendueshme në një demokraci normale dhe nuk ka asnjë reagim të kundër përveç opozitës. Kjo është në dritë të diellit dhe s’mund të rrimë pa thënë dhe nga ana tjetër ka shfrytëzuar qoftë vanitetin, qoftë kalkulimet personale të një grup njerëzish që mendojnë se mbajnë peng vulën dhe faktorizohen e do të kenë vend në politikë. Janë të dy anët e medaljes por interesi i kryeministrit sot është të diktojë opozitën e ta marrë ta fusë për veshi në proçes zgjedhor. Nuk i sollën deri këtu për të mos i futur në zgjedhje. Fraksioni i vulës po bën gjithçka që ka në dorën e tyre sepse ata e dinë se kanë investuar zero e si do të dalin në proçes zgjedhor dhe e dinë që do i përkthehet në rezultat katastrofike që është dëm mbi dëm. Kanë detyrime për ata që i kanë sjellë deri këtu, ua dhanë siglën dhe vulën e famshme do i shlyejnë detyrimet ata do të dalin në proçes zgjedhor.” -tha Kaso.