Drejtorit të Përgjithshëm të Tatimeve, Ceno Klosi i është gjetur një pasuri prrallore. Klosi ishte një ndër zyrtarët e lartë që ligji e ngarkon për të hetuar transaksionet e dyshimta. Por në deklaratën e pasurisë rezulton se ka dhënë 140 mijë paund një shoqërie biznesi. Kjo është bërë përmes 4 transaksioneve në shkurtin e vitit 2019.
Sipas deklaratës vjetore të të ardhurave, rezulton se drejtori i Tatimeve, Ceno Klosi, ka dhënë 140 mijë paund me fajde për shoqëri biznesi përmes 4 transaksioneve në shkurtin e vitit 2019.
Sipas ILDKP, vitin që shkoi, mekanizmi i huadhënies nga kursimet familjare është aktivizuar më 2 prill të 2019-ës, ku është dhënë një borxh prej 10 mije paundësh.
Në 28 janar të 2019-ës, Ceno Klosi duke paguar 100 paund është bërë aksioner themelues me 33% në një biznes në Angli, që nga emri “First bar limited” në Blackwood Close, West Byfleet
Më 20 shkurt të 2019-ës, Ceno Klosi ka dhënë 50 mijë paund dhe në 26 shkurt të po atij viti është regjistruar një hua prej 60 mijë paundësh të tjerë.
Nuk dihet nëse fajdet janë dhënë për një apo disa kompani dhe nëse ato janë vendase apo të huaja, pasi për shkak konfidencialitetit, emri është fshirë në deklaratë.
Ndëtsa neni 170/ç i Kodit Penal parashikon se “Ushtrimi i një ose disa veprimtarive financiare të ndryshme nga veprimtaria bankare, nga persona që nuk janë të licencuar për këtë qëllim, sipas legjislacionit bankar dhe/ose financiar në fuqi, dënohet me gjobë ose burgim gjer në tre vjet”.
Listës i shtohen edhe llogari bankare prej gati 30 mijë eurosh po nga kursimet familjare, tri apartamente në kryeqytet me vlerë 550 mijë euro, 100 mijë euro llogari bankare e bashkëshortja që, ashtu si i shoqi, ka arritur t’i kursejë nga familja.
Me gjithë pasurinë e konsiderueshme drejtori i Përgjithshëm i Tatimeve nuk ka një automjet në pasuri, ndërsa bashkëshortja ka deklaruar në 2021 një automjet “Benz” prodhim i vitit 2002. Duket se në këtë pikë Ceno Klosi e ka shfrytëzuar si duhet postin në OSHEE dhe tatime duke përdorur automjetet e administratës shtetërore.