Ambasadorja amerikane në Shqipëri, Yuri Kim, ka marrë pjesë sot në aktivitetin “Mik Festival”, në Pustec.
Gjatë një komunikimi me mediat, Kim ka folur edhe për reformën në drejtësi.
Sipas saj, reforma në drejtësi ka ecur përpara, por shtoi se “nuk duhet të ndalet”.
Ambasadorja amerikane u ka bërë thirrje autoriteteve të sigurisë të mos heqin dorë, por të vazhdojnë përpara me reformat.
“Mendoj që reforma në drejtësi po ecën përpara. Ngadalë, por është padyshim është një shtysë. Njerëzit duhet të vazhdojnë të jenë të pakënaqur, duhet të jenë më tepër kërkues me qeveritarët e tyre, me njerëzit që ata kanë zgjedhur. Eshtë koha që të vazhdojmë përpara. Mos u dorëzoni.
Disa njerëz thonë që reforma në drejtësi është asgjë, duhet të dorëzohemi, por jo. Po ju gënjejnë, mos hiqni dorë”, ka thënë Kim.
Ajo theksoi më tej se institucionet kanë përgjegjësinë e tyre dhe se, sipas saj, kanë filluar t’i përmbushin detyrimet e tyre.