Një ditë para se të mbahet Kuvendi i Partisë Demokratike, i thirrur nga Sali Berisha, në stadiumin ‘Air Albania’ ka nisur puna për ndërtimin e podiumit që do të shërbejë si skenë për fjalimin e ish-Kryeministrit.
Më 11 dhjetor 2021, do të mblidhet Kuvendi Kombëtar i PD i thirrur nga ish-Kryeministri Sali Berisha, ndërsa në 18 dhjetor, Kuvendi Kombëtar i PD i thirrur nga Lulzim Basha.
Ndërkohë që lideri historik Sali Berisha dhe lideri aktual, Basha po tregojnë ‘forcën’ për të dëshmuar përpara demokratëve dhe opinionit se ç’drejtim do të marrë familja e tyre politike, socialistët nuk e kanë hequr vëmendjen nga detajet dhe zhvillimet brenda kampit blu e veçanërisht ndaj ecurisë së ‘Foltores’ së ish kryeministrit Berisha.
Më herët, kreu i grupit parlamentar të PS-së, Taulant Balla është shprehur në një intervistë televizive se për zhvillimin e këtij takimi duhet të ketë transparencë mbi burimin e të ardhurave, pasi aktivitete të tilla kanë kosto jo të vogël.
“Mendoj se legjislacioni aktual e ka me ligj, dhe strukturat ligjzbatuese, duhet të përfshihen në qartësimin nëse organizatorët se bëjnë këtë transparencë. Organizimi i një aktiviteti i tillë, që do të zhvillohet në ‘Air Albania’, që nga qiraja ndaj federatës së Futbollit dhe deri te shpenzimet e tjera, janë domosdoshmëri dhe ngarkon me përgjegjshmëri organizatorët.Zoti Berisha e ka detyrimin që këtë shpenzim ta deklarojë në Inspektoratin e Deklarimeve të Pasurive. Nëse nuk ndodh, do të vijë në studion tuaj dhe do të kërkojë në Kuvendin e Shqipërisë hetim për këtë çështje.”-tha Balla.
/Tirananews.al