Paul Pogba nuk është aspak i lumtur tek Man.United, dëshira e tij për tu larguar nuk ka ndryshuar me kalimin e kohës, përkundrazi, është përforcuar edhe më shumë gjatë këtij sezoni. “Djajtë e kuq” mund ti ofrojnë gjithçka në aspektin financiar por nuk i garantojnë një të ardhmen si pretendent në Premier League dhe në Champions.
Pogba është gjendur shpesh këtë periudhë mes Juves dhe Realit, dy ekipe që kërkojnë shërbimet e tij, L’Equipe i kushton faqen e parë këtë të premte pikërisht të ardhmes së “gjelit” francez duke i dhënë fund kësaj dileme. “Kënga e lamtumirës”, ky është titulli i të përditshmes franceze, e cila nënvizon edhe një herë dëshirën e Pogba për tu larguar nga Mançesteri.
L’Equipe shpjegon më pas se Pogba është i bindur se ku dëshiron të vijon karrierën, zgjedhja e tij është Madridi: “Reali është destinacioni i tij i preferuar”. As drejtuesit e klubit spanjoll nuk fshihen, përkundrazi, trajneri Zidane e ka shprehur publikisht dëshirën për të afruar në Madrid beniamin e tij. Gjithnjë sipas L’Equipe, Pogba pritet të largohet këtë verë me destinacion Madridin.