E përditshmja franceze Le Figaro ka vënë në dukje Shqipërinë si alternativën më dinamike dhe më të përballueshme financiarisht ndaj destinacioneve tradicionale si Spanja, Italia, Greqia dhe Kroacia, të cilat prej vitesh kanë dominuar turizmin mesdhetar.
Sipas gazetës, vende si Shqipëria, Sllovenia, Mali i Zi dhe Qipro po tërheqin gjithnjë e më shumë vëmendjen e turistëve francezë, falë kombinimit të bregdetit, trashëgimisë kulturore dhe gastronomisë së pasur.
Shqipëria cilësohet si sfiduesja më e fuqishme në rajon për turistët që kërkojnë alternativa autentike mes natyrës dhe historisë, me një rritje rekord të numrit të vizitorëve që nga viti 2019. Një nga faktorët kryesorë të kësaj rritjeje është çmimi: pushimet në Shqipëri janë 30 deri në 50 për qind më të lira se në Greqi apo Itali.
Le Figaro thekson se me afërsisht 400 kilometra vijë bregdetare, Shqipëria ofron plazhe të shumta, gjire dhe ujëra kristal. Riviera Shqiptare në jug paraqet peizazhet më mahnitëse, me detin e kaltër dhe fshatrat e gdhendur në shpatet e maleve. Më në veri, Durrësi shtrihet gjatë bregdetit, ndërsa Tirana magjeps me fasadat e saj shumëngjyrëshe të ndërveshura me gjurmët e së kaluarës komuniste. Kruja ofron pamje panoramike mbi Adriatik, kurse në Apoloni ruhen gjurmët e një qyteti antik mes kodrave dhe ullishteve.
Gazeta e mbyll përshkrimin, për adhuruesit e natyrës, teksa Alpet shqiptare ofrojnë shtigje ende të paeksploruara, megjithëse thekson se infrastruktura në këtë zonë dhe menaxhimi i mbetjeve mbeten problem.