Nga Ledi Shamku
Ka qenë dikur një skeç i Estradës së Fierit me të cilin vijoj e qesh. Lipe Shtogut i kishin vjedhur lopën. Dhe të gjithë ia linin fajin atij: Pse s’e ruajte lopën, si e lidhe, ku ishe, pse s’e pe… derisa më në fund shpërtheu Lipja: Amani ‘re shokë amani ‘re! Opo qysh ere, po hajduti që e vodhi ‘re, s’ka faj fare ai?!
Ky skeç m’u kujtua ndërkohë që gishtii i Policisë Gjuhësore po tregonte mediat dhe portalet fajtore që po na merrkan në qafë Shqipen, se paskëshin shkruar “ShqipËtar” me ë, e jo Shqiptar siç e ka drejtshkrimi.
Të dashur policë, në lëmsh-rregullat tuaja keni thënë e ngulmoni të thoni si më poshtë:
Shqip (pa ë) POR ShqipËri (me ë)
Shqiptoj e Shqiptar (pa ë) POR ShqipËROJ (me ë). Ndërkohë që SHQIPË nuk ka gjëkundi e kjo ë-ja del se kur takohet p-ja me r-në thoni ju, nuk është njëlloj si kur takohet p-ja me t-në, e rruku-rruku e rruku-rruku, e ç’u hyn në xhep ShqipËtarëve si takohen tingujt e shqipËtuar në Shqipë a në ShqipËrime?! Mos kemi vallë tremilion gjuhëtarë?! Lipe Shtogu do ju thoshte: Amani bre shokë policë amani bre! Po ju ‘re, fare s’kini faj ju me kësi xanxash re?!
Se i bie që Shqiptarët, kur shqipërojnë në shqip apo kur shqiptojnë emrin Shqipëri, i bie pra që ata (ne të gjithë) ta mbajmë mend me raste teketek se kur ju e doni “ë”-në e kur nuk e doni. Mendje është e varfra, edhe roit, se e keni mbushur dëngas drejtshkrimin me kësi rastesh kujtese teketek! Dhe e dini ç’bëjnë folësit e çdo gjuhe në kësi rastesh, të dashur ndëshkues? Shtiejnë në punë atë që quhet Analogji, pra vendosin një rregull të njëjtë për të gjitha rastet e kështu mbajnë mend veç rregullën edhe kaq! Pra o të gjitha me “ë”, o të gjitha pa “ë”. Edhe nuk e gabojnë më! Futini një të rilexuar Saussure-it, “Kurs i Gjuhësisë së Përgjithshme”, se ai i varfri ka një kapitull të tërë për Analogjinë. Për ju e ka shkruar, paçka se njëri nga ju, shokë policë, tha se Saussure tanimë ishte i tejkaluar. Po qysh ere e tejkaluat kur nuk e kaluat?!
Le që ç’ju kërkoj dhe unë juve, jo Saussure jo dëngër-mëngër! “Stalini dhe çështje të gjuhësisë” si e ndan këtë punën me Shqiptar e Shqipëri? Si si? Thotë që “syleshët po na marrin më qafë perandorinë”? Kuptova. E di Stalini që ju keni kërkuar ligj kundër syleshëve shqipËtarë? Thuajani se do gëzohet!