200 ndeshje të luajtura dhe 27 gola të shënuar, pasi la fushën si futbollist, Ledian Memushaj bëhet kandidat për stolin e Pescara. 36-vjeçari është në listën me emrat që mund të zëvendësojnë trajnerin Colombo. Skuadra, e cila në harkun e pak viteve ka zbritur nga elita në Serinë C, nivelin e tretë të futbollit italian, nuk ka një ecuri të mirë.
Në më pak se një vit, ai ka shansin të marrë drejtimin e ekipit të parë. Presidenti Sebastiani nuk dëshiron të bëjë prova dhe kërkon që tekniku i ri ta njohë mirë ambientin dhe lojtarët. Asnjë më mirë se Ledian Memushaj nuk mund ta bëjë këtë, me shqiptarin që deri pak muaj më parë ishte vetë në fushë dhe mbante shiritin e kapitenit.
Objektivi për ish-mesfushorin e Kombëtares është që ta mbajë skuadrën të paktën në vendin e tretë, duke e vendosur në pozita komode në ndeshjet play-off për të synuar kthimin një kategori më lart.