Dhuna online që po ju bëhet grave dhe vajzave, është emergjenca ku kërkohet ndërhyrje me ligj. Alarmi u dha në konferencën e rrjetit parlamentar ”Gra të Lira nga Dhuna” që organizohet për herë të parë nga Kuvendi bashkë me Asamblenë Parlamentare të Komisionit Evropian në Tiranë.
Pedagogia dhe bashkëshortja e kryeministrit, Linda Rama, ngriti tonin për gjuhën e urrejtjes duke bërë publike shifrat e organizatave ndërkombëtare të viktimave gra e vajza nga teknologjia, bullizmi kibernetik apo tinëzarët digjitalë.
“Në raportin e vitit 2024, bullizimi kibernetik arriti nivel rekord në Evropë, numri i viktimave vajza në çdo vend evropian është më i lartë se i djemve. Analiza e UNWomen rezulton se 41% e grave kanë qenë subjekt i një lloj dhunë online nëpërmjet teknologjisë, kryesisht nga instagrami. 50% e dhunuesve janë tinëzarë digjital persona të panjohur. 37%5 të dhunuarve e zgjidhin vetë duke u shkëputur dhe pak i drejtohen policisë me mosbesim se do të gjejnë zgjidhje tek ato”, tha Linda Rama.
Po ashtu Rama u bëri thirrje vajzave dhe grave të shoqërive civile, deputeteve dhe ministreve që të bëhen barrikadë kundër denigrimit online dhe gjuhës së urrejtjes. “Në raportin e monitorimit për gjuhën e urrejtjes në Shqipëri 2023, në shënjestër të diskursit denigrues është gjinia. Ka gazetarë e analistë, politikanë, artistë pedagogë që bëjnë gjyqin e të tjerëve pa u kundërshtuar nga intervistuesit drejtuesit e emisioneve”, tha Linda Rama.