11 persona u proceduan për incidentet në protestën e 20 shkurtit, ku u hodhën shishe me lëndë djegëse në drejtim të godinës së Kryeministrisë. Por vetëm 4 persona u arrestuan, por u liruan sot nga Gjykata. Demokratët pretendojnë se në radhët e protestuesve, kishte efektivë të policisë civilë të cilët provokuan dhe ushtruan dhunë ndaj personave të pranishëm, duke i shoqëruar ata me forcë.
Kreu i grupit parlamentar i PD-së, Gazment Bardhi bashkë me deputetët që ishin në sallë, tha se përshëndet vendimin e Gjykatës për lirimin e tyre, por akuzoi se janë 3 policë që kanë dhunuar protestuesit, që sipas tij është bërë me urdhër politik.
“Paralajmëroj se dhuna ndaj jashtë asaj që lejon ligji është akt personal dhe ka pasoja personale. Çdo punonjës policie duhet të respektojë ligjin, të drejtat e njeriut dhe nuk mund të ushtrojë dot dhunë nën autoritetin e uniformës. Të gjithë janë identifikuar dhe do të mbajnë përgjegjësi për aktet e tyre. Përshëndes gjykatën për vendimin, askush nuk ka shkelur ligjin. Kishin dalë për të protestuar dhe nuk kishte arsye pse të merreshin peng për 3 ditë. Por kur policia drejtohet nga shërbëtore të krimit mund të presësh gjithçka. Dhuna është ushtruar gjatë shoqërimit dhe në komisariat. Janë 3 punonjës policie përgjegjës për këto akte. Dy protestues kanë shenja në fytyrë, të tjerët kanë fraktura në trup për shkak të dhunës me urdhër politik. Kemi bërë një ankesë në AMP dhe kallëzim penal”, tha Bardhi.