“El Clasico” nuk zhgënjen asnjëherë. Ajo që konsiderohet si sfida e sfidave dhuroi edhe një herë spektakël dhe emocione, që e bëjnë futbollin sportin më të ndjekur në botë.
Gola të shënuar dhe anuluar, penallti të revokuara dhe të humbura, luftë sportive dhe karton të kuq.
Tifozët nuk mund të kërkonin më shumë se kaq, sidomos ata të Real Madrid, që në tempullin e tyre “Santiago Bernabeu” festuan fitoren 2-1 kundër rivalëve të përjetshëm të Barcelonës.
Një kthim te triumfi për “los blancos” pas katër humbjesh radhazi në të gjithë kompeticonet dhe një shkëputje në krye të renditjes.
Pasi pa të revokohej nga VAR një 11 metërsh dhe të anulohej një gol për një pozicion milimetrik jashtë loje, populli “merengez” nisi festën me golin e epërsisë të shënuar nga Mbappe në minutën e 22-të.
Barcelona reagoi fort dhe në minutën e 38-të barazoi sërish shifrat me Firmin Lopez.
Por shpresat e skuadrës “blaugrana” morën një tjetër goditje të rëndë, kur vetëm dy minuta nga fundi I pjesës së parë Bellingham ktheu në epërsi të zotët e shtëpisë.
Pas pushimit, Mbappe kishte në këmbët e tij shansin për të “vrarë” garën, por gaboi nga pika e penalltisë në minutën e 52-të.
Pjesa tjetër e sfidës ishte e luftuar, por nuk solli asgjë përveç rasteve të humbura në të dyja zonat dhe kartonin e kuq të Pedri kur kishte përfunduar edhe koha shtesë.
Një fitore e madhe për Real Madrid, që përveç festës mendoi edhe për përgjigjen ndaj Lamin Yamal. I vërshëllyer gjatë gjithë ndeshjes pas deklaratave të bujshme në vigjilje të “El Clasico”, ai u sulmua verbalisht nga lojtarët madrilenë.