Europa League rikthehet sonte në mbrëmje me sfidat e raundit të 1/16-ve. Disa prej klubeve me më shumë histori në futbollin e kontinentit të vjetër do të ndeshen mbrëmjen e sotme për të luftuar për trofeun e Europa League.
Sfida më e fortë e kësaj faze është Barcelona-Manchester United, që ritakohen me njëra-tjetrën pas plot 4 vitesh. Barcelona është në një formë shumë të mirë në La Liga, ndërkohë që edhe United ka pasur rritje në ndeshjet e fundit.
Juventus, që vjen pas sanksioneve në kampionat, do të ketë përballë në fazën e 1/16-ve francezët e Nantes. Skuadra italiane kërkon t’i shkojë deri në fund kompeticionit dhe pse jo ta fitojë atë, për të qenë të sigurt për pjesëmarrjen në Champions për sezonin e ardhshëm.
Roma do të përballet në transfertë me ekipin e Salzburg, me Mourinhon që dëshiron një tjetër trofe me “verdhekuqtë”, pas atij të Conference League edicionin e kaluar. Ajax do të sfidojë Union Berlin, një skuadër që është në super formë.
