E ëma e Oriola Marashit, Xhoi Jakaj, ishte e ftuar pasditen e sotme në emisionin “Rudina” për të promovuar librin e saj më të ri “Grua”. Gjatë bisedës me Rudina Magjistarin ajo foli edhe për vajzat e saj dhe zbuloi një sekret të Oriolës.
Xhoi tregoi se vajza e saj do të vijë shumë shpejt me një këngë dhe projekti mzuikor do të jetë shumë i madh. Ajo tha se zhanrin e këngës nuk mundet ta zbulojë, sepse mund të jetë një përzierje mes dy zhanreve të ndryshme.
Jakaj foli edhe për atë pjesë që ne dimë shumë pak nga Oriola. Ajo tregoi se vajza e saj ka studiuar për 9 vite muzikë klasike dhe se është mezzosoprano. Pa u treguar fare modeste, Xhoi u shpreh se Oriola ka një zë shumë të mirë e madje mësuesit e saj e kanë cilësuar si zërin më të bukur në Ballkan.
“Oriola ka studiuar 9 vite për muzikë klasike. Është mezzosoprano, ka dhënë disa koncerte me maestro Suzana Turku. Mendoj që ka zërin më të mirë, më fal për mungesën e modestisë, të paktën mësuesit e saj thonë që është një ndër zërat më të bukur në Ballkan. Pengu im më i madh është që ta shoh Oriolën sa më shpejt me muzikë klasike. Nuk e ka braktisur muzikën klasike, i ka ndjekur hapat një pas një”, tha Xhoi Jakaj.
Ndër të tjera ajo foli edhe për lidhjen e Oriolës me futbollistin Eros Grezda dhe u shpreh mjaft e lumtur për zgjedhjen që vajza e saj ka bërë.