Gjykata e Tiranës ka zbutur masën e sigurisë për Amarilda Lekën, ish-asistenten e ish-ministres së Inovacionit dhe Administratës Publike,Milena Harito. Organi i drejtësisë ka vendosur që ta lërë në arrest shtëpie 33-vjeçaren. Mësohet se vendimi është marrë vetëm pak ditë më parë nga Gjykata e Tiranës.
Amarilda Leka u arrestua në nëntor të vitit të kaluar, pasi kishte përvetësuar shuma të mëdha parash nga qytetarë të ndryshëm. Ajo prezantohej si juriste e Gjykatës së Lartë dhe si ish-nusja e djalit të ish-ministrit të Mbrojtjes, Luan Hajdaraga. Në këmbim të shumave të mëdha financiare, ajo u premtonte viktimave, se do t’i ndihmonte për të liruar njerëz nga burgu, duke ndikuar tek gjyqtarët.
Amarilda Leka, në vitin 2015 arriti që t’i merrte 25 mijë e 500 euro Zef Gjokës, vëllait të të arrestuarit, Xhorxh Gjoka, i cili ishte kapur me drogë. Leka, 30-vjeç në atë kohë mësohet se ka kontaktuar Gjokën dhe i ka thënë se ishte nusja e djalit të ish-ministrit të ndjerë, Luan Hajdaraga, Ervinit, dhe se kishte njohje shumë të forta me gjyqtarët.
Po ashtu në të njëjtën kohë, Leka, që prezantohej me emrin Ilda Leka, arriti të mashtronte edhe një taksist me emrin Liman Koçi, të cilit i premtoi se do t’i lironte djalin nga burgu në këmbim të një shume të majme parash.
Gjatë kësaj kohe, Leka ishte edhe sekretare e shtabit elektoral të PS në Tiranë dhe asistente e ish-Ministres, Milena Harito. Mirëpo vetë Harito e ka përgënjeshtruar këtë fakt, duke u shprehur se Leka nuk ishte sekretare e shtabit elektoral, por thjesht aktiviste.