Marrëveshja e armëpushimit dhe lirimit të pengjeve midis Izraelit dhe Hamasit është pritur me gëzim nga palestinezët, por një qasje më e kujdesshme në Izrael, ku demonstruesit si pro dhe kundër marrëveshjes kanë dalë në rrugë.
Në sheshin e pengjeve, një shesh jashtë Muzeut të Artit të Tel Avivit, disa qindra miq dhe të afërm të pengjeve u takuan të enjten në mbrëmje. Shumë njerëz mbaheshin përdore dhe qëndronin në heshtje.
“Është një përzierje emocionesh”, tha një 27 vjeçar, kushëri i njërit prej pengjeve. “Sigurisht që jemi shumë të lumtur që njerëzit po kthehen në shtëpi, por nga ana tjetër nuk e dimë gjendjen e tyre. Dhe Evyatar nuk është në listën e parë. Jemi në ankth sepse çdo ditë që qëndron aty është në rrezik.”
Ndërkohë në Jerusalem, rreth 1500 njerëz protestuan kundër marrëveshjes jashtë kryeministrisë, zyrës së Benjamin Netanyahu, duke bllokuar një autostradë aty pranë dhe u shpërndanë nga policia.
Shumë prej tyre mbanin të zeza dhe kishin bojë të kuqe në duar, me pankarta që thoshin: “Një i burgosur i liruar sot është terrorist nesër” dhe: “Ju nuk keni mandat t’i dorëzoheni Hamasit”.
Marrëveshja, e cila supozohet të hyjë në fuqi të dielën, përbëhet nga tre faza: në fazën e parë 42-ditore, 33 pengje izraelitë pritet të lirohen në këmbim të qindra palestinezëve të mbajtur në burgjet izraelite. Në Gaza, popullsia , 2.3 milionëshe – pothuajse të gjithë janë të zhvendosur nga shtëpitë e tyre – do të lejohet të lëvizin lirshëm nëpër territor dhe pritet të ketë një rritje të madhe në furnizimet me ndihma.