Për herë të parë në historinë e boksit shqiptar, një sportist kuqezi do të përballet me një prej emrave më të mëdhenj të peshave të rënda. Kristian Prenga ngjitet sonte në ring në Xhedah të Arabisë Saudite, ku nga ora 22:00 do të sfidojë ish-kampionin e dyfishtë të botës, Anthony Joshua.
Edhe pse britaniku konsiderohet favorit absolut, prania e Prengës në një duel të këtij niveli përbën një moment historik për sportin shqiptar. Për 35-vjeçarin nga Oroshi i Mirditës, kjo është ndeshja më e rëndësishme e karrierës, ndërsa për Shqipërinë një mundësi për t’u përfaqësuar në elitën botërore të boksit.
Prenga vjen me një rekord prej 20 fitoresh dhe vetëm një humbjeje, me të gjitha fitoret e arritura me nokaut. Ai siguroi këtë përballje pasi mposhti Joe Jones në raundin e parë në Atlantic City, ndërsa më herët kishte triumfuar edhe ndaj amerikanit Joey Dawejko.
Në krahun tjetër qëndron Anthony Joshua, kampion olimpik në Londër 2012 dhe ish-kampion i unifikuar i botës në peshat e rënda, me 29 fitore dhe 4 humbje në karrierë.
Joshua synon të vijojë rrugën drejt superduelit me Tyson Fury, ndërsa Prenga kërkon të shkruajë historinë, duke u bërë shqiptari i parë që mposht një ish-kampion të unifikuar të botës në peshat e rënda. Sonte, në Xhedah, në ring nuk do të jetë vetëm një ndeshje boksi, por edhe një moment krenarie për sportin shqiptar.