Përveç se është një prej futbollistëve më të mirë shqiptarë në Serie A, mbrojtësi kuqezi Marash Kumbulla që luan me Romën, tregohet një njeri i madh edhe jashtë fushës së blertë. “Calciomercato” e cilëson mbrojtësin shtatlart si një “djalë me zemër të artë”, pasi Marashi i ka dërguar një video inkurajimi një vogëlushi shqiptar në Milano.
Sapo mbrojtësi i Romës mësoi mbi vështirësitë e Ajnit të vogël 4-vjeçar, për t’u integruar në shkollë, ndërsa qante për shkak se nuk e dinte gjuhën, Kumbulla i dërgoi atij një mesazh me disa fjalë zemre.
“Përshëndetje Ajni, nëna jote më tha, që je pak e trishtuar këto ditë. Ju nuk duhet të jeni kështu, sepse Italia është një vend shumë i bukur dhe do t’ju japë të gjitha mundësitë për të përmbushur ëndrrat tuaja. Unë të dërgoj një përqafim të madh, hajde, kampion i vogël,”- shprehet Marash Kumbulla në videon që i ka dërguar vogëlushit.
Për momentin Ajni i vogël i ka harruar lotët dhe ka nisur të buzëqeshë e të lumturohet nga idhulli i tij i ri. Mamaja e vogëlushit, e emocionuar për veprimin e Kumbullës, ka bërë publik gjestin njerëzor të Marashit në rrjetet sociale, gjest që ka tërhequr vëmendjen e njerëzve në rrjetet sociale.
Shumë ndjekës të Kumbullës në rrjetet sociale e kanë përgëzuar futbollistin mbi gjestin e tij fisnik ndaj një bashkëkombasi të vogël emigrant, i cili ka nevojë për t’u integruar në jetën italiane.