Menaxheri i hotelit ku qëndruan kontrollorët e Albcontrol, ka treguar detaje nga shoqërimi i tyre në polici.
Në një intervistë për ‘News24’ Dashi Shehu tha se policia kishte mbërritur jashtë hotelit rreth orës 22:00, ndërsa priste një urdhër për shoqërimin e tyre.
Sipas tij, kontrollorët janë shoqëruar në polici rreth orës 23:30, ndërsa theksoi se nuk bënë rezistencë.
Kujtojmë se në polici u shoqëruan 26 kontrollorë, ndërsa 3 prej tyre qëndrojnë aktualisht në komisariat.
INTERVISTA
Si ka qenë situata?
Rreth 25 dhoma ishin prenotuar. Disa prej tyre kishin marrë dhoma, disa ishin tek bari. Rreth orës 23:00 erdhi policia dhe i mori.
Ata kishin marrë dhoma pas orës 20:00?
Ata kishin prenotuar dhoma, pasi nuk kishin ku rrinin
Rreth çfare ore erdhën policët?
Rreth orës 22:00 kishte ardhur policia. Furgonat po prisnin jashtë që të merrnin urdhër.
A kanë paguar kontrollorët?
Ne i kemi faturuar, por shpresojmë që pagesën ta bëjnë sot.
Po pjesëtarë të stafit tuaj u shoqëruan?
U morën dhe dy pjesëtarë të stafit për sqarime të mëtejshme. Pas 2-3 orësh u lanë të lirë.
Keni pasur kontakte me policinë?
Policia këtu u shfaq rreth orës 22:00 të darkës, po monitoronin kontrollorët dhe më pas bënë thirrjen dhe i shoqëruan. Policia në dhoma nuk u futën. Kontrollorët i thirrën përmes telefonit. Pak a shumë ata ishin përgatitur se diçka mund të ndodhte.
Ka pasur tensione gjatë shoqërimit?
Situata ishte e qetë. Ata kishin dhe avokatin aty gjatë kohës dhe kur ikën në komisariat.
A janë marrë pamjet nga kamerat e sigurisë nga ana e policisë?
Pamjet nuk na janë kërkuar. Por jemi në dispozicion.