Pasi u dënua, Partizani-Vllaznia do të luhet me tifozë. Supersfida e kthimit në çerekfinalet e Kupës së Shqipërisë mund të jetë vendimtare për sezonin e të kuqve, që duke vlerësuar peshën e përballjes vendosi të konvertojë në pagesë monetare dënimin e fushës.
Partizani u dënua nga Disiplina me zhvillimin e dy ndeshjeve pa tifozë. Pas shlyerjes së gjysmës së dënimit, në ndeshjen e kampionatit në Shkodër, kryeqytetasit aktivizuan rregullin ku pjesa e mbetur mund të paguhet në formë gjobe.
Partizani do të ndeshet me Vllazninë këtë të mërkurë, në “Kompleksin Partizani”, duke nisur prej orës 16:00.
Sfida e parë në Loro Boriçi përfundoi me fitoren 3-1 të shkodranëve dhe ekipit të Colella-s i nevojitet një përmbysje e madhe, për tu kualifikuar në gjysmëfinale. Me të kuqtë që janë edhe në luftën për titull, ëndrra e madhe e tifozëve është fitimi i të dy trofeve në këtë sezon.