Njerëzit ndahen në 2 kampe kur vjen puna te majoneza. Unë personalisht hyj te kampi që nuk e konsumoj, megjithëse duhet të jem e sinqertë dhe të pranoj që sa herë më ka rastisur majoneza në një sanduiç, pa dijeninë time, sërish më është dukur e shijshme. Kryesisht ama, e shmang si ushqim.
Provoni njëherë ta gatuani në shtëpi, jeni me fat, sepse është mjaft e thjeshtë në përgatitje, dhe aq e shëndetshme saç mund të jetë majoneza, të paktën ky version i bërë në shtëpi është më i sigurt se çfarë shitet nëpër dyqane.
Kujdes: Mbajeni këtë majonezë maksimalisht deri në 2-3 ditë në frigorifer.
Përbërësit
2 të verdha vezësh
1 lugë mustardë
200 ml vaj ulliri
lëng limoni
kripë
Përgatitja
1. Në një tas të vogël përzieni bashkë të verdhat e vezëve me mustardë. Rrihini për 30 sekonda derisa të bëhen kremoze.
2. Shtoni vajin e ullirit pikë mbas pike, gjithnjë duke rrahur, derisa kremi të nisë të trashet. Shtoni më pas vajin e mbetur në një rrjedhë të ngadaltë ndërsa rrihni, derisa të mbarojë dhe majoneza të jetë trashur.
3. Hollojeni paksa majonezën me pak lëng limoni, duke e përzier, më pas rregullojeni me kripë sipas dëshirës tuaj. Mbajeni majonezën në një kavanoz të mbyllur në frigorifer.