Në plazhin e Darëzezës vijon procesi i monitorimit entomologjik pas kryerjes së shërbimit të dezinsektimit, i cili rezultoi me efikasitet të plotë. Ministrja e Shëndetësisë dhe Mbrojtjes Sociale, Albana Koçiu ndau në rrjetet sociale momente nga procesi i evidentimit dhe vlerësimit të habitateve potenciale për zhvillimin e larvave të mushkonjave.
Koçiu tha se “ky proces do të monitorohet në vazhdimësi për kryerjen e shërbimeve pasuese në këto zona, për të pasur një sezon veror dhe plazh pa bezdisje nga mushkonjat”. “Evidentimi i vatrave të reja dhe vlerësimi i atyre ekzistuese, është thelbësor në suksesin e shërbimit të dezinsektimit për vijimësinë e sezonit veror”, shtoi Koçiu.
Në kuadër të Programit Kombëtar të Dezinsektimit për vitin 2024 në zonat turistike në të gjitha qarqet në vend u krye faza e parë e procesit të dezinsektimit me qëllim sigurimin e një mjedisi sa më të pastër e të qetë për pushuesit dhe turistët. Pas dezinsektimit procesi do të vijojë me studimin entomologjik rast pas rasti nga ekspertët e shëndetit publik, për të evidentuar edhe efektivitetin e dezinsektimit të kryer në të gjitha zonat turistike, laguna dhe parqe.