Probleme nga moti i keq ka edhe në qarkun e Fierit. Gjatë 24 orëve të fundit situata e reshjeve në bashkitë Fier, Patos e Mallakastër paraqitet me disa problematika. Për shkak të motit të keq ka patur probleme në disa fshatra dhe aktualisht më shumë se 1000 abonentë janë pa energji elektrike.
Në zonën e Roskovecit në fshatrat Suk 1 e Suk 2 ka pasur ndërprerje të energjisë elektrike, e cila është rikthyer në orët e para të mëngjesit. Në zonën e Levanit, Kafaraj, Qarr e Bishan energjia ka munguar për disa orë ndërsa në Peshtan momentalisht janë 50 familje për shkak të dëmtimit të një kabine elektrike, hyrja në të cilën është e vështirë.
Në Mallakastër, në fshatrat Klos, Hekal, Kutë e Frashër janë pa energji elektrike rreth 300 abonentë ndërsa grupet e punës janë në gatishmëri për riparimin e dëmeve. Pa energji elektrike është stacioni i pompimit në Poçëm, duke sjellë pengesa në furnizimin me ujë të zonës.
Situata është nën kontroll e monitorim të vazhdueshëm. Lumenjtë Vjosa e Seman janë në shtratin e tyre, hidrovoret punojnë me kapacitet të plotë ndërsa dëme në tokat bujqësore nuk ka.