Turqia, rivali ynë në grupin eliminator të “Euro 2020” ka vendosur të bëjë ndryshime në stol. Federata turke e futbollit vendosi ta zëvendësojë rumunin Mircea Lucescu me teknikun Senol Gunes. Ky i fundit do të rikthehet në këtë post, që e mbante edhe 15 vite më parë.
Gunes, i cili ishte trajner i Turqisë në mes të viteve 2002-2004, kur kombëtarja e këtij vendi përfundoi e treta në Kupën e Botës 2002, do të qëndrojë edhe në stolin e Besiktas deri në fund të sezonit.
Trajneri Gunes pritet të punojë me ekipin kombëtar turk për ndeshjet kundër Shqipërisë dhe Moldavisë, të cilat do t’i luajë në fund të marsit. 66-vjeçari ka fituar dy herë kampionatin turk me Besiktas. Ai, gjithashtu, ka trajnuar Trabzonspor dhe Bursaspor. Turqia ka vuajtur nën drejtimin e rumanit Lucesku dhe zbriti në Ligën C të “Nations League”, pas përfundimit në pjesën e poshtme të grupit të vet, edicionin e parë të këtij kompeticioni të ri.
Kujtojmë se kuqezinjtë tanë janë shortuar në Grupin H, bashkë me Turqinë, Francën, Islandën, Andorrën dhe Moldavinë. Ndeshja e parë e kësaj fushate eliminatore për Shqipërinë do të luhet më 22 mars, ora 20:45, në stadiumin “Loro Boriçi”, pikërisht ndaj turqve me trajner “part time”.