“Dosja.al” shkruan se ish-futbollisti dhe tekniku Nevil Dede, do të jetë trajneri i ri i skuadrës bardheblu të Tiranës. Ai do të drejtojë 25 herë kampionët e Shqipërisë për dy sezonet e ardhshëm.
Drejtuesit e klubit kryeqytetas të Tiranës, menjëherë pas shkarkimit të trajnerit Emanuel Egbo për eliminimin nga Kupa e Shqipërisë pas humbjes 0-1 ndaj Korabit, janë takuar me trajnerin Nevil Dede dhe kanë arritur marrëveshjen midis tyre për të bashkëpunuar gjatë dy sezoneve të ardhshëm.
Burime të besueshme tregojnë për “Dosja.al” se po sot, Nevil Dede, është takuar edhe me presidentin e FSHF-së, Armand Duka, dhe i ka paraqitur atij dorëheqjen nga detyra e trajnerit të përfaqësueses kuqezi U-19.
Bëhet gjithashtu me dije se nesër, tekniku Nevil Dede do të prezantohet zyrtarisht si trajneri i ri i skuadrës bardheblu të Tiranës.