Pas një rrugëtimi të gjatë dhe të mbushur me ndjesi të forta, Rozana Radi u përball me një surprizë. Në një atmosferë të qetë dhe intime, Rozanës iu transmetuan disa imazhe të realizuara me kujdes, ku ajo dhe babai i saj i ndjerë shfaqeshin së bashku në mënyrë artistike ashtu siç mund t’i kishte parë në ëndrrat e saj më të thella.
Imazhet përshkruanin skena të ngrohta e plot dashuri mes vajzës dhe të atit, të krijuara për të dhënë ndjesinë e pranisë së tij shpirtërore. Ndërsa në sfond dëgjohej një poezi prekëse që babai i saj ia kishte lënë me dedikim Rozanës, emocioni u bë i papërmbajtshëm.
Por surprizat nuk përfunduan aty. Pak çaste më vonë, një kor i përbërë nga artistë të rinj interpretoi dy këngë të fuqishme dhe simbolike për jetën dhe dashurinë-“Të dua ty” nga Soni Malaj dhe “Thërrime dashurie” nga Marsela Çibukaj, të cilat shtuan edhe më shumë emocionin e skenës.
Në skenë hyri motra e saj, Andeta Radi. Takimi mes tyre ishte plot mall, lot dhe përqafime. Rozana, e përfshirë nga emocioni, i kërkoi falje për gjërat që s’kishte mundur t’i bënte dhe për kohët kur ndoshta nuk kishte qenë aq e pranishme sa do të donte.