Vendimi i Gjykatës së Apelit për vulën duket se e ka përçarë edhe më shumë PD-në, edhe pse grupi Alibeaj që siguroi vulën, thotë se duan bashkim.
Ndaj dhe për këtë, që PD-ja të shkojë e bashkuar në zgjedhjet lokale të 14 Majit, është miratuar ngritja e një grupi prej tre deputetësh të cilët janë mandatuar për të biseduar me grupin e Rithemelimit për çështjen e gjetjes së gjuhës së përbashkët për një kandidat të Partisë Demokratike.
Ky grup do të përbëhet nga Gazment Bardhi, Merita Bakiu dhe Flamur Hoxha. Gjithashtu forumet e PD-së vendosën afatin e këtij komunikimi deri ditën e premte.
Më parë, kreu i grupit parlamentar Enkelejd Alibeaj, në një dalje për gazetarët pas mbledhjes së Kryesisë dhe Grupit Parlamentar të Partisë Demokratike, është shprehur se ndihet drejtues dhe ushtrues i detyrës së kryetarit që prej se ish-kryedemokrati Lulzim Basha dha dorëheqjen.
“Jo vetëm jam, por ndihem drejtuesi i PD-së, ushtruesi i detyrës, dhe jo vetëm sot por që nga momenti që zoti Basha bëri të ditur dorëheqjen,” deklaroi ai.