Iker Kasijas do të jetë pjesë e stafit Portos. Ka qenë klubi portugez që ka njoftuar rolin e ri të portierit. Në fundin e sezonit të kaluar, Kasijas trembi jo pak sportdashësit, teksa kaloi një atak kardiak. Megjithatë, spanjolli ia doli ta kalonte rrezikun, ndërsa tashmë është në fazën e rikuperimit. Edhe pse legjenda e portës ende nuk e ka deklaruar tërheqjen e tij nga futbolli, sërish mbeten të pakta mundësitë që Kasijas të kthehet protagonist në fushë, duke llogaritur moshën.
Në këtë formë, Kasijas do të fillojë tashmë një eksperiencë të re, ndërsa do të ketë detyrën për të mbuluar lidhjen mes klubit, lojtarëve dhe trajnerit. “ Do të provoj të bëj diçka ndryshe nga ajo që bëja në fushë. Do të mundohem të bëj lidhjet mes skuadrës dhe klubit.
Në sezonin e kaluar, pas asaj që më ka ndodhur, trajneri më ka folur dhe më ka shprehur dëshirën që unë të qëndroja këtu, pranë lojtarëve, edhe atyre më të rinj, sepse do të kishte shumë ndryshime. Do të provoj të bëj më të mirën për të ndihmuar shokët e skuadrës”, u shpreh Kasijas.