Presidenti Ilir Meta ka refuzuar sot të dekretojë ligjin për Kadastrën, duke e rikthyer për rishqyrtim në Kuvend.
“Në respekt të Kushtetutës së Republikës së Shqipërisë dhe në ushtrim të së drejtës të parashikuar në pikën 1 të nenit 85 të saj, Institucioni i Presidentit të Republikës bën me dije se me Dekretin nr. 11055, datë 15.01.2019, Presidenti i Republikës ka vendosur kthimin në Kuvend të ligjit nr. 111/2018 “Për kadastrën”, me qëllim rishqyrtimin e tij, sipas arsyetimit bashkëlidhur këtij dekreti” thuhet në njoftimin e Presidencës.
Në një arsyetim të gjatë, Presidenti thotë se disa nene të këtij ligji bien në kundërshtim me legjislacionin bazë të të drejtave civile në Republikën e Shqipërisë, duke cënuar parimin e sigurisë juridike dhe duke krijuar tension kushtetues.