Këto 24 orë kanë shënuar një tjetër rekord të shifrave të koronavirusit në vendin tonë. Ministria e Shëndetësisë raporton se në 24 orët e fundit janë konfirmuar pozitivë 69 persona.
Në lidhje me numrin rekord të të infektuarve, ku sipas gjurmimit epidemiologjik numri i lartë vjen si pasojë e moszbatimit të masave në qendra dhe biznese ku ofrohet shërbim për qytetarët, ka sjellë edhe reagimin e fortë të Ministrisë së Shëndetësisë dhe Mbrojtjes Sociale e cila apelon për zbatimin me korrektësi të protokolleve të sigurisë në punë.
“Nisur nga fakti se ditet e fundit po zbulohen raste pozitive në disa ndërmarrje dhe subjekte tregtare, Ministria e Shëndetësisë dhe Mbrojtjes Sociale i bën thirrje edhe njëherë bizneseve, të zbatojnë me korrektësi protokollet e sigurisë në punë: të dezinfektojnë ambientet, të kryejnë ajrosjen rregullisht, të përdoren maskat apo barrierat mbrojtëse në çdo subjekt shërbimi për qytetarët, siç e përcaktojnë protokollet e autoriteteve shëndetësore.”-deklaron Dr.Eugena Tomini.
Ndër të tjera, MSH bën me dije se “çdo shkelje do të konsiderohet me rrezik për shëndetin e qytetarëve dhe si e tillë do të ndëshkohet sipas ligjeve në fuqi.”
Ministria e Shëndetësisë dhe Mbrojtjes Sociale apelon për vetëndërgjegjësim nga qytetarët që të jenë të kujdesshëm në zbatimin e masave të vendosura:Kur dilni, qendroni në distancë fizike prej të paktën 1.5 metër, lani duart, përdorni maska ose barriera mbrojtese kur nuk mund te ruhet distanca fizike, dezinfektoni objektet dhe ajrosni ambientet ku qendroni.Lidhuni me mjekun tuaj të familjes nëpërmjet linjës së gjelbër 0800 40 40 për barnat me rimbursim apo pyetje në lidhje me Covid19.
Nëse keni shenja të sëmundjes, qëndroni të izoluar dhe telefononi Urgjencën Kombëtare, 127.
/Tirananews.al