Aksidenti tragjik në Kroaci i autobusit me targa të Kosovës ka veshur me të zeza familjarët e 10 personave që humbën jetën dje tragjikisht teksa autobusi i tyre u përmbys në mes të rrugës.

Ndërkohë 45 persona të tjerë janë në spital, pasi kanë mbetur të lënduar. Para Spitalit të Përgjithshëm në Slavonski Brod janë mbledhur familjarë dhe të afërm të të lënduarve.

Familjet e të ndjerëve morën dje informacionet e tmerrshme, sot do të duhet të identifikojnë trupat e të dashurve të tyre. Të tjerët erdhën për të vizituar të plagosurit në pavijonet e spitalit.

Tek qytetari Arif Kikaj , i cili mbërriti nga Peja, emocionet janë të rënda e të ndara. Vajza e tij 37-vjeçare Alinda Iprijaj mbeti e vdekur në tragjedinë e ndodhur që u mori jetën edhe 9 të tjerëve.

Ai qan ndërsa flet për të, ndërsa më tej tregon se Alinda e ndjerë kishte në autobus me të 4 nga 5 fëmijët e saj. Fatmirësisht fëmijët nuk janë lënduar. Kur përmend këtë fakt se fëmijët nuk kanë pësuar lëndime, një buzëqeshje e zbehtë i kalon në fytyrë.

Dhëndri i tij, burri i Alindës së ndjerë, Can Iprijaj ulet në një mur betoni dhe ngul sytë në hapësirë i përhumbur.

“Kam punuar për 10 vjet në Rijeka dhe 30 vjet më parë kam shkuar në Gjermani. Unë u ktheva në Kosovë dhe fëmijët e mi, Alinda dhe dy djemtë e tjerë, qëndruan në Shtutgart. Ajo ka punuar atje si infermiere. Ajo mendoi të vinte tek ne me pushime. Ata po mendonin të shkonin me aeroplan për në Prishtinë, por përsëri vendosën të merrnin autobusin për më lirë. Është një tragjedi e madhe për ne” tregon Arifi me lot, duke shtuar se do ta varrosë të bijën në Kosovë.

Fëmijët janë të moshës 14, 12, 9 dhe 7 vjeç. Ata i kanë parë ata dhe po presin momentin kur stafi i spitalit do t’i lejojë t’i marrë.

“Dhëndri ishte me ta. Ata e pyetën: Babi, ku është mami?” thotë Arifi, pastaj qan përsëri. Ata planifikojnë t’i marrin fëmijët në Kosovë dhe pas disa ditësh pasi të varrosin nënën e tyre atje, ata do të kthehen në Gjermani.

PËRGJIGJU

Please enter your comment!
Please enter your name here