Kryeministri i vendit, Edi Rama dha disa qëndrime lidhur me funksionimin e drejtësisë në Shqipëri dhe Reformës që është ndërmarrë në të. Gjithashtu, kreu i qeverisë bëri një paralajmërim të fortë, ku tha se do të ketë kallëzime në SPAK edhe për kryebashkiakë socialistë, që sipas tij i ka kapur Njësia anti-korrupsion.
“Shumë shpejt do ketë kallëzime në SPAK për kryetarë bashkie të PS-së nga Njësia Anti Korrupsion. Ne bëjmë punën tonë. Çfarë kallëzimi duhet të bëjmë ne? Njësia Anti korrupsion bën kallëzime në kuadër të veprimtarisë së vet. Nuk mund të bëjmë ne kallëzime për politikanët kundërshtarë. i kemi bërë në të kaluarën, por unë kam qenë gjithmonë kundër tyre. Nuk është fare kjo puna jonë.
“SPAK të mos gjuajë dinamit për cironka. Kjo ka shumë rëndësi. As të mos bëjë KLSH-në, apo inspektimin financiar të Ministrisë së Financave sepse janë institucione të ndara. SPAK duhet të merret me të korruptuarit dhe jo me procedura. Këto nuk janë procedura, nuk kanë nevojë për shumë mund për ti identifikuar si subjekte të SPAK. Është shumë e thjeshtë. Mendoj se edhe prokurorët që janë në detyrë dhe nuk kanë vepruar dhe kanë lënë të parashkruhen vepra të kësaj natyre duhen pyetur për këtë gjë. Të kërkosh më shumë nga gjithë ky system që e kemi krijuar është detyrim, jo ndërhyrje”, tha Rama.