Kjo fundjavë i ka shërbyer Partizanit për të zhvilluar dhe një test përpara rinisjes së kampionatit, të cilin të kuqtë e kaluan mjaft mirë. Ekipi fitoi me rezultatin e thellë 6-1 në miqësoren kundër Luzit 2008. Që në fillim kryeqyteasit nuk patën mëshirë teksa shënuan me Mensah.
Pas tij, radha ishte e Hotit që shënoi dhe mbylli pjesën e parë me rezultatin 2-0. Në fraksionin e dytë nuk kishte surpriza. Mensah shënoi dhe dy herë të tjera duke kompletuar tripletën e tij. Hoti shënoi dhe golin e pestë ndërsa Zekolli mbylli gjithçka me rezultatin 6-1.
Një provë e mirë kjo për të kuqtë që këtë të premte përballen me Vllazninë në shtëpi në Superligë. Drejtuesit e kuq përveç ndeshjes me shkodranët po mendojnë dhe për afrimet e janarit ku në lajmet e fundit po qarkullon është një rikthim i Lorenc Trashit.
Pas afro 2 vitesh e gjysmë, futbollisti nga Gramshi nuk është më pjesë e Al Kadsia në kampionatin e Kuvajtit. Trashi falënderoi me anë të një postimi presidentin dhe stafin e klubit në Kuvajt ndërsa nuk preferoi të tregonte asgjë lidhur me të ardhmen e tij.