Pas përleshjes fizike që ndodhi mes banorëve të Divjakës dhe forcave të Policisë së Shtetit për traun e vendosur që do jetë me pagesë, Ministria e Turizmit tha se nga tarifa përjashtohen banorët e zonës. Por kjo nuk i ka bindur banorët, pasi edhe këtë të premte ata do të dalin sërish në një protestë.
Sipas vendimit vizitorët që hyjnë në parkun e Divjakës, duhet të paguajnë tarifë. Bileta është kërkuar dhe vendosur nga Agjencia e Zonave të Mbrojtura me çmim 50 lekë për individët dhe 150 lekë për automjetet.
Ish-zv/kryeministri dhe deputeti i PS-së, Erion Braçe thotë se trau i vendosur nga Ministria e Turizmit në Parkun e Divjakës është ndërtim pa leje që rrezikon jetën e qytetarëve. Për të është i rrezikshëm pasi dëmtohet siguria rrugore.
Nga ana tjetër, Braçe ka hedhur akuza të forta, kur tha se zyrtarë të Ministrisë së Mjedisit kanë telefonuar zyrtarë të Divjakës dhe u kanë thënë se “do të fluturojnë” nëse e pengojnë ndërkohë që ata kanë qenë në të drejtën e tyre që kërkonin që të kishte leje ndërtim.