Astrit Patozi deklaron se partia e tij Bindja Demokratike është duke zhvilluar negociata dhe me Nismën Thurje dhe LZHK-në e Dashamir Shehit për zgjedhjet e ardhshme lokale.
“Disa forca politike që kanë ngjashmëri mund të bashkojnë forcat e tyre dhe të kandidojnë me një listë të përbashkët duke pasur synim këshillat bashkiak, dhe duke mos gjetur dakordësi me palëve në PD, të kenë edhe synim edhe mazhoritarin. Të rigrupohen që të japin një ofertë tjetër ndryshe nga Foltorja apo pala tjetër kundërshtare. Ne gjejmë pika të përbashkëta me LZHK dhe ‘Nismën Thurrje’ dhe ne mund të konkurrojmë dhe të gjejmë një rezultat të rëndësishëm duke i hapur rrugën një poli tjetër opozitar që nuk besojnë të qeveria dhe as opozita”, tha Patozi.
Duke folur në Report tv, Patozi komentoi edhe “luftën” brenda Partisë Demokratike, duke thënë zgjidhja më e mirë do të ishte që 2 palët, ajo e Sali Berishës dhe e Enklejd Alibeajt të ndaheshin. “Të ndaheshin në mënyrë të qytetëruar, për fat të keq kjo këshillë modeste nuk u mor parasysh dhe PD po shtyn agoninë e vetes së saj dhe duke dëmtuar përtej vetes, por edhe të gjithë opozitën. Të dy copat e PD, po ndjekin një linjë të gabuar. Unë mendoj që janë futur në një kurs të gabuar, nuk dua të them kush ka më shumë të drejtë”, shtoi Patozi.