Këtë të enjte po mbahet seanca e parë plenare në Kuvend pas zgjedhjeve lokale, ku një pjesë e opozitës nuk ka ardhur. Kryetari i grupit parlamentar të PS, Taulant Balla i bëri thirrje që t’i kthehen punës për çështje me rëndësi pasi janë gati për bashkëpunim. Sa i përket mbështetësve të Berishës, shprehet se të insistosh te i njëjti gabim është çmenduri.
“S’dua të bëj replikë me askënd, as shkopin që ka mbetur pa flamur e asaj që foli në emër të asaj që ka mbetur nga foltorja e Berishës, mendoj që historia që në këto vite që humbësi e sheh fajin te kundërshtari dhe asnjëherë nuk e bën një analizë se çfarë ka bërë gabim, është se të insistosh te gabimi është çmenduri.
Apeli im edhe pse opozita e nisi punën me bojkot të pranueshëm pas rezultatit në zgjedhje, thirrja ështyë që opozita t’i rikthehet punës në Kuvend. Duhet të punojmë për një sërë çështjesh që kanë rëndësi mes opozitës dhe mazhorancës. Jemi gati të vijojmë bashkëpunimin.
Opozita s’mund të marrë peng zgjedhjen e një organi të rëndësishëm kushtetues si Avokat i Popullit. Prej të hënës do i kërkojmë opozitës duhet të ulemi për të dakordësuar kandidatin që do të jetë dhe avokat i popullit”, tha Balla.