Partia Demokratike, forca politike që njihet zyrtarisht dhe që drejtohet me kryetar të komanduar Enkelejd Alibeaj, tha sonte se simbolet e saj po përdoren nga partia e Ilir Metës.
Sekretari për Çështjet Ligjore dhe Zgjedhore, Indrit Sefa, thotë se ky përdorim vjen në kushtet kur nuk ka asnjë marrëveshje.
“Partia Demokratike e Shqipërisë konstaton gjatë ditëve të fundit përdorimin e simboleve të saj nga drejtues të Partisë së Lirisë në takimet elektorale të këtyre të fundit me qytetarë apo simpatizantë.
Partia Demokratike nuk ka asnjë marrëveshje dhe asnjë formë bashkëpunimi elektoral me Partinë e Lirisë apo me grupime politike që janë në koalicion me të.
Perdorimi i simboleve të Partisë Demokratike ka për qëllim krijimin e imazhit të gabuar dhe deformimin e imazhit dhe qendrimit të saj.
Ky është një akt i dënueshëm dhe nga kodi elektoral dhe për këtë arsye të enjten do t’i drejtohemi zyrtarisht KQZ për marrjen e masave urgjente që të tilla përdorime të shmangen sa më shpejt të jetë e mundur”.