Kryeministri Edi Rama mëngjesin e kësaj të premteje, e ka nisur me pamje të veçanta nga ishulli i pelikanëve në lagunën e Divjakë-Karavastasë, oazi i pelikanit kaçurrel në vendin tonë. Që prej muajit janar të këtij viti ka nisur procesi i folezimit të kolonisë së Pelikanit Kaçurrel (Pelecanus crispus) në Ishullin e Pelikanit.
“Pamje të veçanta nga ishulli i Pelikanit, shtëpia e shpendit simbol të lagunës së Karavastasë siç është Pelikani Kaçurrel i cili sipas monitorimeve të specialistëve të Agjencisë Kombëtare e Zonave të Mbrojtura është në një vit të mbarë të shumimit”, shkruan Rama.
Turizmi i vëzhgimit të shpendëve lagunorë tashmë po kthehet në një lëvizje të vërtetë turistike edhe për vendin tonë. Shembulli më domethënës për këtë mbetet numri i përditshëm i vizitorëve vendas e të huaj që vijnë të vëzhgojnë nga afër shpendët e shumtë, që tashmë e kanë kthyer lagunën e Divjakë-Karavastasë në habitatin e tyre të përhershëm.