Transferimi i Frederik Veselit drejt futbollit francez ka qenë shumë pranë dështimit dhe vetëm të hënën në darkë, futbollisti i kombëtares ka mësuar se mund të bëhej pjesë e klubit të Le Mansh për të cilin kishte firmosur. Gjithçka ka qenë për shkak të dokumentacionit të bllokuar nga Federata Italiane e cila nuk ia mundësonte atij firmën me klubin e Ligës 2.
Veseli udhëtoi në ditën e fundit të merkatos së janarit drejt Francës për të nënshkruar me francezët dhe çështja u cilësua e zyrtarizuar edhe nga Empoli. Por pavarësisht se u depozituan dokumentet e tij në Federatën Franceze për regjistrimin me Le Mansh, një gjë e tillë nuk u bë e mundur më datë 31, duke vënë në dyshim ligjshmërinë e transferimit.
Federata Italiane, për arsye të pashpjeguara, nuk lëshonte kartonin ndërkombëtar të lojtarit dhe e vonoi atë duke kaluar afatet, aq sa gjatë ditës së hënë, lojtari nuk dinte realisht se pjesë e cilit ekip ishte. Vetëm në orët e darkës së të hënës, më datë 3 shkurt, klubi bëri të ditur se kartoni kishte mbërritur më në fund dhe Veseli do të ishte i gatshëm për duelin e radhës të Le Mansh, duke mbyllur peripecinë e huazimit të lojtarit nga Empoli.