Komisioni i Pavarur i Kualifikimit ka përjashtuar komisioneren Etleda Çiftja nga procesi i vlerësimit të dosjes së gjyqtarit Altin Abdiu dhe Andri Ymeri, me argumentin se nuk garanton besueshmëri në gjykim. Dy gjyqtarët Andri Ymeri dhe Altin Abdiu kërkuan përjashtimin nga trupa e vlerësimit të komisioneres Etleda Çiftes me motivacionin se nuk mundet një e pandehur të gjykojë një gjyqtar.
Burime për tirananews.al bëjnë me dije se sot një tjetër trupë e KPK-së vendosi me shumicë pranimin e kërkesës së tyre dhe shpalljen e papajtueshmërisë së Etleda Çiftjes për të gjykuar.
Mësohet se anëtarët e KPK-së pranuan pretendimet se komisionerja Çiftja e cila është nën hetim nga SPAK për falsifikimi të dokumenteve dhe deklarimit të rremë, nuk krijon besueshmëri në vendimmarrjen e saj. Sipas tyre, për sa kohë që Komisionerja akuzohet nga SPAK për vepra penale që lidhen me pasurinë, ngrihen dyshime të forta që kryerja e procesit të rivlerësimit ndaj gjyqtarit Altin Abdiu dhe Andri Ymeri, do të sjellë cenimin e besueshmërisë dhe kredibilitetit të KPK-së duke cenuar edhe procesin e vettingut dhe besimin e publikut te drejtësia.
Në kushtet e këtij konflikti interesi, KPK-së vendosi përjashtimin e komisioneres Etleda Çiftja nga procesi i vlerësimit të dosjes së gjyqtarëve Altin Abdiu dhe Andri Ymeri, që është “de facto” dhe një përjashtim nga çdo proces. Vendimi i sotëm do të shërbejë dhe si precedent për çdo subjekt rivlerësimi që do të kërkojë përjashtimin e komisioneres nga shqyrtimi i dosjes së tij.
Lexo edhe: Përballet me dy akuza/ Shkon në SPAK anëtarja e KPK Etleda Çiftja