Kreu i Komitetit Drejtues Kombëtar në Partinë e Lirisë, Edmond Haxhinasto zhvilloi një takim me bashkatdhetarët në Bruksel, Belgjikë. Haxhinasto theksoi se Shqipëria duhet të ketë ekonomi të qëndrueshme.
”Paratë tuaja duhet të shkojnë për investime dhe kjo është një skemë tjetër që ne dëshirojmë të ndërtojmë, që ju të keni mundësi të vini të investoni në Shqipëri pa paguar. Sepse boll keni sakrifikuar këtej që të vini të paguani. Ekonomia jonë të fuqizohet me investime të reja, por edhe ju të shpërbleheni për atë mund që keni bërë”, tha Haxhinasto.
Haxhinasto shtoi se një sektor tjetër shumë i rëndësishëm është bujqësia. ”Do të mbështetet në mënyrë shumë agresive, deri në 300 milionë euro në vit, janë paratë aty, por është çështje politike, por paratë janë. Fermeri shqiptar duhet mbështetur në mënyrë shumë të fuqishme, në mënyrë që ai të prodhojë për të mirën e gjithë vendit. Që shqiptarët të konsumojnë produktet e tyre me kosto shumë më të lirë dhe të sigurta. Që mos bëjnë kërdinë sëmundjet e tmerrshme që kanë kapur shqiptarët, sepse sistemi atje është copë-copë”.