Policia e Shtetit bën të ditur se është ekstraduar nga Belgjika, Dritan Xhelita, 45 vjeç, i cili është dënuar me 14 vite burg për vrasje të mbetur në tentativë. Ai është autor i ngjarjes më 2 janar të 1998 të plagosjes së policit Pirro Ymeraj në lagjen “Pavarësia” në Vlorë.
Xhelita ishte ekstraduar dhe njëherë më parë nga Belgjika, pikërisht në vitin 2009, por u la i lirë me një vendim gjykate, e më pas me ankim të prokurorit çështja u rikthye në Gjykatën e Apelit e cila e dënoi me 14 vite burg në vitin 2016.
NGJARJA
Në datën 02.01.1998 në vendin e quajtur lagja “Pavarësia” ne qytetin e Vlorës, në afërsi të banesës së Festim Xhelita, është zhvilluar një përleshje me armë mes punonjësve të policisë Piro Ymeraj e shtetasit Alket Muca me Dritan e Rexhina Xhelita dhe vëllait të tyre Ilir Xhelita.
Nga përplasja me armë kanë mbetur të vrarë Alket Muca e Ilir Xhelita, si dhe të plagosur Piro Ymeraj, Dritan Xhelita e Rexhina Xhelita.
Si shkak që punonjësi i policisë ka shkuar afër shtëpisë së Xhelitajve ka qenë njoftimi në polici i një shtetasi për kanosje me armë nga vëllezërit Xhelita.
Funksionari i Drejtorisë së Policisë Vlorë Piro Ymeraj është nisur menjëherë me mjetin fuoristradë me targa private DI0903A së bashku me shtetasin Alket Muca.
Sapo ka zbritur nga makina Piro Ymeraj i është drejtuar Dritan Xhelitës si shef i krimeve dhe i ka thënë se duhet të shkonte me të në Komisariat. Dritani nuk ka pranuar dhe ndërkohë ka ndërhyrë e motra e tij Rexhina, e cila ka pare që i vëllai po shoqërohej nën armë nga përfaqësuesi i policisë. Ata kanë bërtitur dhe në këtë kohë ka dalë nga shtëpia duke qëlluar me pistolete, vëllai tjetër (viktima) Ilir Xhelita. Punonjësi i policisë për t’iu shmangur të shtënave është futur në një godinë që ishte në ndërtim e sipër duke tërhequr pas vetes Dritan Xhelitën, si dhe duke porositur Alket Muca të mos e linte Ilir Xhelitën të afrohej.
Në këto momente Dritani i është shkëputur nga dora për një çast shefit të krimeve, duke arritur të marrë një pistolete dhe qëlluar në drejtim të tij. Piro Ymeraj ka tentuar të qëllojë me pistoletën e tij, por ajo nuk ka shkrepur dhe në këtë mënyrë është drejtuar për tek makina ku kishte automatikun, por është goditur nga plumba dhe ka rënë përmbys.
Mes Ilir Xhelitës e Alket Muçës është shkëmbyer zjarr deri sa u kanë mbaruar karikatorët dhe të dy kanë humbur jetën.