Detaje të reja kanë dalë në dritë nga ngjarja e ndodhur në orët e para të mëngjesit të sotëm në Durrës, ku në një dhomë hoteli mbeti i plagosur shtetasi Arni Sulejmani.
Burime bëjnë me dije se 3 djemtë e përfshirë në këtë ngjarje kanë qenë nën efektin e alkoolit, ndërsa vajza që ka fshehur armën e krimit ka qenë transgjinore.
Burime nga policia njoftojnë se shtetasit Markeljan Beqiri dhe Tefik Shehu janë shpallur në kërkim. Shehu dyshohet se është edhe personi që ka shkrepur armën në drejtim të Sulejmanit, i cili fatmirësisht ndodhet jashtë rrezikut për jetën.
Dy personat e vetëm që janë vënë në pranga është e reja transgjinore Anxhela Brisku dhe Enver Hysenaj, i cili ka përkrahuar autorët e krimit.
Ngjarja
20-vjeçari Arni Sulejmani ngeli i plagosur nga Tefik Shehu 32 vjeç i cili është shpallur në kërkim bashkë me shokun e tij Markeljan Beqiri.
Sipas njoftimit zyrtar të Policisë brenda dhomës së hotelit ndodhej i plagosuri, dy djemtë e shpallur në kërkim dhe 22-vjeçarja Anxhela Brisku.
Kjo e fundit përfundoi në prangat e policisë pasi kishte fshehur armën e krimit, atë me të cilën Tefik Shehu kishte qëlluar ndaj 20-vjeçarit.
66-vjeçari Enver Hysenaj po ashtu është arrestuar pasi ka strehuar vajzën pas ngjarjes. Policia po punon për zbardhjen e plotë të ngjarjes pasi ende nuk dihet se pse të rinjtë ishin takuar në dhomën e hotelit apo rrethanat deri në shkrepjen e armës.