Klubi i Romës është në qendër të një skandali, që lidhet me ekspozimin e një videoje të një prej punonjëseve të qendrës sportive Trigoria, ku vajza shihet në momente intime me të dashurin e saj. Video ka bërë xhiron jo vetëm të dhomave të zhveshjes, por edhe të sallave të drejtuesve më të lartë në Trigoria, duke u shpërndarë nga celulari në celular e nga chat-i në chat, mes të qeshurash dhe komenteve seksiste.
Futbollistë, trajnerë e madje edhe disa drejtues (nga ekipet e të rinjve por jo vetëm), e kanë shpërndarë videon erotike duke e komentuar dhe denigruar imazhin e saj. “Papajtueshmëria mjedisore”, është arsyeja zyrtare e shkarkimit, siç shkruan avokati Lorenzo Vitali, menaxher ligjor i kompanisë Friedkin. “Një video u soll në vëmendjen e Departamentit të Burimeve Njerëzore dhe menaxhmentit të lartë, e cila ju portretizon duke kryer akte seksuale. Fatkeqësisht, kuptojmë që kjo video është parë nga një pjesë e madhe e stafit dhe lojtarëve”, thuhet në letrën e largimit nga puna që ka marrë punonjësja e re.
Të tjerë raportojnë “komente të rënda seksuale në mediat sociale dhe bisedat e brendshme”. Faktet datojnë në vjeshtën e kaluar, kur video qarkulloi për disa javë derisa punonjësja u dëbua në nëntor.