Nga Ardit Rada
Viti që lamë pas do të cilësohej si i mbrapshtë në historinë e vendit, sikur këtë titull të mos e kishte zënë Ismail Kadare. Në plot 365 ditë shqiptarët përjetuan dhunëne protestave, djegien e mandateve, bojkotin e zgjedhjeve, dekrete e çdekrete që erdhën nga bulevardi e deri te kulmimi me një fatkeqësi natyrore. Bilanci i humbjeve të opozitës së udhëhequr nga PD nuk ka më nevojë të listohet. Ai është i njohur dhe i dënuar si nga ndërkombëtarët, ashtu edhe nga baza e vetë partisë që drejton Basha.
Ditën e djeshme, opozita ka vendosur të rikthehet në tryezë dialogu, duke rrëzuar poshtë të gjitha parakushtet dhe paragjykimet për Ramën në veçanti. Kësisoj, Lulzim Basha i është përgjigjur thirrjeve të OSBE-së dhe çdo ambasade aktive në Tiranë që e ka parë dialogun si e vetmja rrugë demokratike. Tashmë ‘topi’ mbetet në krahun e opozitës, nëse do t’i përgjigjet tryezave të tjera, apo a do të kërkojë ajo vetë marrëveshje në vijim për të shpëtuar së pari veten e saj.
Pas takimit mes Gjiknurit, Bylykbashit, Vasilit dhe Hajdarit, ka një mori kritikash ndaj PD dhe LSI. Demokratët e kanë parë prezencën e tyre në tryezë si zbutje të ‘luftës’ së nisur ndaj qeverisë. Ndërsa socialistët, si shenjë dobësie nga ana e opozitës së mbetur rrugëve, pa asnjë pushtet përveç zyrës së Ilir Metës. Pre e paragjykimeve ka rënë prej kohësh edhe Rudina Hajdari, që është konsideruar si e përdorur në historinë e reformës zgjedhore dhe si mjet presioni ndaj Bashës, se reforma mund të kalojë me votat e Rudinës.
I gjithë ky kompleksim që i bëhet opozitë, ngjan i tepërt kur të gjithë presim një klimë politike më të qetë e bashkëpunuese. Edhe pse duhet të ishte tërmeti ai që duhet t’i ulte palët në tryezë, le të mbahemi pas proverbit ‘më mirë vonë, se kurrë’.
Opozita e Bashës do t’u japë mundësinë të gjithëve për kritika në vijim. Së pari për faktin që do të shkojë në zgjedhje ndërkohë që nuk drejton më asnjë bashki. Së dyti, Basha do të jetë sërish i përkëdheluri, që pa pasur një parti parlamentare do të gjehen mekanizmat që t’i jepen komisionerë e numërues.
Megjithatë, kjo do të ndodhë në një kohë më të largët.
Kush nuk e mban dot mllefin mund të kapet, përshembull, pas emrit të Vasilit që e kanë çuar në tryezë si strateg.
Të tjerët, të ndjekin në qetësi nëse do të zgjidhet ‘nyja gordiane’ që lidhi Basha me shokë.