Policia e Kosovës bëri të ditur të premten se ka arrestuar pesë persona të dyshuar për kontrabandë mallrash në fshatin Kovaç të Zubin Potokut. Personat e arrestuar kanë qëlluar edhe me armë në drejtim të policisë.
Sipas njoftimit për shtyp, si rezultat i aktiviteteve policore në brezin kufitar, bazuar edhe në informacionet që ka pasur në dispozicion policia, në fshatin Kovaç (Farkëtarët), zona e përgjegjësisë e Stacionit Policor Kufitar-Jasenovik, janë arrestuar pesë persona të dyshuar për kontrabandë mallrash dhe sulm me armë.
“Një person i dyshuar ka arritur ti shmanget arrestimit dhe është larguar në drejtim të panjohur”, thuhet në njoftimin e Policisë së Kosovës.
Për të vënë situatën nën kontroll, për të evituar sulmin e mëtejmë dhe për të eliminuar çdo rrezik të mundshëm ndaj zyrtarëve policorë, policia informon se janë përdorur armë e zjarri nga policët e përfshirë në këtë ngjarje.
“Në këtë operacion, janë sekuestruar katër vetura, të cilat kanë qenë të përfshira në rastin konkret, ku në një njërën prej tyre është hasur një sasi e cigareve, të cilat dyshohet se ishin duke u kontrabanduar përmes rrugëve ilegale nga Serbia. Në vend ngjarje kanë dalë të gjitha njësitë relevante”, theksohet ndër të tjera në njoftim.
Policia ka bërë të ditur se ky rast është duke u trajtuar nga hetuesit e Drejtorisë Rajonale Veriu, në koordinim me organet tjera kompetente.