Klered Bozhanaj, 42 vjeç i cili mbrëmjen e djeshme plagosi efektivin e Shqiponjave vijon të jetë në arrati dhe i armatosur.
Policia në një njoftim për mediat bën me dije se i ka shtrirë kontrollet në 4 qytete, Tiranë, Elbasan, Durrës dhe Vlorë.
Policia u ka bërë sërish thirrje qytetarëve për ndihmë, duke u kujtuar edhe shpërblimin e vënë në dispozicion prej 20 mijë euro.
“Gjatë natës së mbrëmshme dhe ditës së sotme, ka vijuar kërkimi intensiv për kapjen e autorit të ngjarjes së ndodhur në rrugën “Hysen Xhura”, shtetasit Klered Bozhanaj, 42 vjeç, i cili tentoi të vriste me armë zjarri punonjësin e Policisë.
Shërbimet e Policisë kanë kontrolluar dhjetëra banesa në qytetet Tiranë, Elbasan, Durrës dhe Vlorë dhe do të vijojnë kontrollet intesive, deri në kapjen e tij.
DVP Tiranë falënderon qytetarët, për informacionet e dhëna deri tani, të cilat janë duke u verifikuar nga Policia. Policia kërkon vijimin e bashkëpunimit, duke ftuar qytetarët që të japin informacion për autorin e kësaj ngjarjeje dhe vendos shpërblim 20 000 euro, për çdo informacion të vlefshëm, që do të çojë në kapjen e tij.
Drejtoria Vendore e Policisë Tiranë vendos në dispozicion të qytetarëve, numrin e telefonit 0694111546, duke garantuar anonimatin e plotë të çdo telefonuesi”, thotë policia.