Ministri i Jashtëm, Ditmir Bushati dhe kryeministri Edi Rama zhvilluan një takim me trupin diplomatik në Shqipëri.
Bushati në fjalën e tij theksoi se 2018 ishte një vit tepër pozitiv për Shqipërinë në rrugëtimin e saj drejt Bashkimit Europian. “2018 ishte një vit pozitiv përsa i përket procesit të ingtegrimit europian të Shqipërisë. Për herë të parë pas shumë vitesh falë reformave shtet-konsoliduese dhe mbështetjes së Komisionit Europian, Shqipëria fillimisht mori një rekomandim të qartë si kristali për fillimin ebisedimeve për anëtarësim në BE. Po kështu vendet anëtare të BE-së përcaktuan një kalendar të qartë përsa i përket nisjes së bisedimeve për anëtarësim, duke na kujtuar në të njëjtën kohë që reformat shtetndërtuese duhet të vazhdojnë me të njëjtin ritëm nga ana e Shqipërisë. Në 2018 ne filluam punën përgatitore me Komisionin Europian, një punë që dita ditës po nxjerr në pah nevojën për reforma molekulare në të gjithë administratën në Shqipëri në përputhje me detyrimet që burojnë nga procesi i anëtarësimit në Bashkimin Europian. 2018 gjithashtu shënoi momente të rëndësishme dhe përsa i përket strategjisë së zgjerimit të BE për Ballkanin Perëndimor, agjendës së ndërlidhshmërisë disa vite pas samitit të Selanikut ku qartësisht u përcaktua rruga europiane e vendeve të Ballkanit Perëndimor”, tha Bushati.
Në fjalën e tij Bushati u ndal edhe tek marrëdhëniet e fqinjësisë së mirë mes vendit tonë dhe Greqisë. Ai bëri thirrje për një njohje për progresin e arritur në marrëdhëniet e mira mes dy vendeve fqinje.
“Dua t’ju falenderoj të gjithëve për bashkëpunimin që kemi pasur, për punën shembullore që jemi përpjekur të kryejmë në radhë të parë me Greqinë, pavarësisht diferencave që kemi. Por besoj se ka qenë një punë e cila ka demonstruar vullnetin në radhë të parë të dy kryeministrave, të Shqipërisë dhe Greqisë, të qeverive dhe të vendeve përkatëse për të ecur para dhe për të mbyllur njëherë e mirë të gjiha çështjet të cilat kanë kohë që janë pezull. Së dyti, marrëveshja e Prespës, ku Shqipëria dhe shqiptarët në vendin fqinj kanë luajtur një rol përcaktues dhe ne shpresojmë, urojmë, besojmë që kjo marrëveshje të miratohet sa më parë në Parlamentin e Shkupit e më pas Athinës, për ti hapur rrugën kësisoj edhe perspektivës euroatlnatike të vendit tonë fqinj. Së treti kemi mbështetur proceset e dialogut mes Serbisë e Kosovës, si rruga e vetme për të siguruar ardhmërinë evropiane të dy vendeve”, tha ai
Bushati gjithashtu tha se Shqipëria do të marrë kryesimin e OSBE dhe se gjatë 2018-s, vendi ynë ka dhënë një kontributit të rëndësishëm në arenën ndërkombëtare.
“Për herë të parë që nga anëtarësimi i Shqipërisë në OSBE, Shqipëria do të ketë fatin dhe nderin e madh që të drejtojë këtë organizatë të rëndësishme me një gjeografi të gjërë, nga Valdivostoku në Vankuver, me 57 pjesëmarrës, dhe u bënë pak ditë që Shqipëria gjithashtu është pjesë e Trojkës, së bashku me Italinë dhe Slovakinë. Natyrisht që për një vend që përgjithësisht ka qenë konsumator i OSBE dhe tanimë do të jetë jo vetëm kontributor po dhe përcaktues përsa i përket bashkëveprimit në Trojkë dhe në vende të tjera partnere në këtë organizatë, kjo nuk është një arritje e vogël. Unë jam i bindur që në 2019 , e më pas në 2020, Shqipëria do të vërtetojë që e ka merituar plotësisht mbështetjen njëzëri të të gjitha vendeve të kësaj organizate”, theksoi Bushati.
Kreu i diplomacisë shqiptare falenderoi edhe partnerët e Shqipërisë, SHBA dhe BE, por të gjithë vendet që kanë statusin e partnerit strategjik, për mbështetjen.